Монгол Улсдаа төдийгүй Азидаа тэргүүлэх хөрөнгөтөн, мэргэжлийн сумогийн их аварга Д.Дагвадорж хорт хавдар туссанд олон хүн гайхаж, бас хардах юм. Хардах хардахдаа айсуй сонгуульд нэр дэвших гэж байгаа хүн шоу хийж, сонгуулийн өмнө хорт хавдар ялсан баатрын дүрээр гарч ирнэ гэж хардаж байна. Улс төр, эрх мэдэл үнэ цэнтэй байж болно.

Гэхдээ ийм зүйлээр шоу хийх хэмжээнд юу сан билээ гэж бодогдох. Тэр тусмаа үндэсний бөхийн манлай заан Д.Долгорсүрэнгийн гэрт төрж өссөн, ах нар нь улсын цолтонгууд гэхээр энэ өрх айлд ёс заншил, жудгаас гадна сүсэг бишрэл гэж айхтар зүйл ноёлж байх учиртай.

Ийм гэр бүлд төрж өссөн аварга маань арай ч “хорт хавдар” туслаа гэж улс төрийн шоу хийхгүй байх гэж би бол хувьдаа итгэж байна. Монгол эрчүүд тэр бүрий эмнэлэг явж, ойр ойрхон шинжилгээ өгөөд байхгүй л дээ. Тэр сар бүхэн шинжилгээ өгөөд байх цаг нартай, хөрөнгө мөнгөтэй хүн байж болох ч уугуулийн монгол эрийн хэнэггүй зан хойш татсан байхыг үгүйсгэхгүй. Тэгээд ч бөх хүн баргийн зовиурыг мэдрэхгүй ч байж мэдэх юм.

Хардах шалтгаан бол түүнд олон бий. Хамгийн наад зах нь спортын хүн яахаараа гэх бүдүүн зүрхтэй, мулгуудхан хардлага төрж болно. Олонхийн ойлгож байгаагаар Д.Дагвадорж өвдөж хавдахын аргагүй хад чулуу шиг дүрээр нийтийн сэтгэл мөнхөрсөн од хүн учраас тэр шүү дээ.

Нөгөө талаар ийм хэмжээний хөрөнгө сан хөмрөг агуулж байгаа баян хүн хавдар тустлаа үзүүлж харуулахгүй явна гэж байхгүй гэж үзэж байна. Ухаандаа их хөрөнгө мөнгөндөө хайртай гэсэн санаагаар хардаж байгаа бололтой. Азидаа тэргүүлэх хэмжээний хөрөнгөтөн өдөр бүр биш юмаа гэхэд сар тутам гадагшаа явж бие хаагаа хянуулдаг байх гэж үзэж байна. Өнөөх л илүүдээ дутуу нь дургүйн үлгэрээр хардаж байгаа болов уу.

Эцэст нь өнөөх үндэстний үзлээрээ баян хүн аминдаа юу юунаас хайртай байдаг. Тэд л өвчин зовлонгүй эрүүл саруул байж чадна гэсэн дорой үзлээ тулгаж байгаа бололтой. Ямартай ч Асса маань хавдраар шоу хийх хүн биш гэж үзэж байгаа учраас ялаад босоод ирээрэй гэж ерөөх байна.

С.Данзан