Жанжин Д.Сүхбаатарын гурав дахь үеийн гуч Д.Сүхжаргалмаа улс төр, нийгмийн чиглэлд олон чухал асуудал хөндөж, түүнийхээ төлөө тэмцэж явдгаар нь иргэд олон нийт танина. Үндсэн хууль, хүний эрх, жендерийн асуудал хөндөж явсан энэ эмэгтэйн санаа бодол хууль эрх зүйн хүрээнд үр өгөөжөө өгсөн гэдгийг салбарынхан ярьдаг.
Тиймдээ ч У.Хүрэлсүх Ерөнхий сайдаар ажиллаж байхдаа өөрийнхөө Жендерийн асуудал хариуцсан орон тооны бус зөвлөхөөр дэргэдээ авч ажиллуулсан байж таарна. Улс төрийн талаасаа ч аль нэг нам эвсэл дагаж бус өөрийн итгэл үнэмшил, үзэл баримтлалын дагуу дуу хоолой болж явдаг хашир туршлагатай хүн учраас өнөөгийн улс төрд байх ёстой дүрийн нэг яах аргагүй мөн. Гэвч түүний итгэл үнэмшилд нийцэх нам, эвсэл хараахан байгаагүй учраас иргэний индэр дээрээс дуу хоолойгоо хүргэсээр ирсэн. Харин Д.Сүхжаргалмаа иргэний индэр дээрээс олон жил дуу хоолой болж явсан ч тодорхой үр дүн гараагүй учраас ШИНЭ нам, ШИНЭ нэгдсэн эвслийг сонгон ирсэн нь санаандгүй хэрэг биш. Түүний эх оронч үзэл санаа, үндэсний ардчиллын дуу хоолойтой ШИНЭ нэгдсэн эвслийн үзэл баримтлал яг таг нийцэж байгаа учраас ШИНЭ намыг сонгосон хэрэг.
Хүн талаас нь харвал нутаг сэтгэл, элэг татсан ч тал байж болох юм. Учир нь ШИНЭ намын дарга, ШИНЭ нэгдсэн эвслийн тэргүүн Цэндсүрэнгийн Гантулга жанжин Д.Сүхбаатарын уугуул нутаг Сүхбаатар аймгийн Сүхбаатар сумын гарвалтай хүн. Ц.Гантулга нам, эвслээ эх оронч, тэмцэгчдийн эгнээгээр өргөжүүлж, үндэсний ардчиллын төлөө тэмцэж байгаагаас харахад яах аргагүй тэмцэгчдийн ямар нэгэн өгөгдөл байхыг үгүйсгэхгүй.
Тэгээд ч Д.Сүхжаргалмаагийн хувьд тэмцэгч гэдгийг иргэд олон нийт сайн мэднэ. Тэр хэдийгээр МАН-ын дарга, Ерөнхий сайдын зөвлөхөөр ажиллаж байсан ч “Өнөөгийн улс төрийн нөхцөл байдлыг авч үзвэл сүүлийн 20 жил тувт нам хоорондын тэмцэл явсан. Улсын түүхэнд намын түүх багтдаг болохоос биш намын түүхэнд улсын түүх багтдаггүй. Гарцаагүй нэг намын засаглалтай, төвлөрсөн төлөвлөгөөт эдийн засагтай байсан үе бидэнд бий. Гэхдээ түүхийг хэн ч үгүйсгэж болохгүй. Тийм эрх ч үгүй” хэмээж байсан. ШИНЭ нэгдсэн эвсэл бол харьцангуй залуусын нэгдэл гэж болно. Тэгэхээр Д.Сүхжаргалмаа шиг хашир туршлага бүхий тэмцэгч түшиг болж таарна. Жанжны удмын тэмцэгчид ШИНЭ намын үзэл баримтлал, бодлого ч таалагдаж, ШИНЭ намд түүний туршлага, эх оронч үзэл санаа юу юунаас хэрэгтэй байсан болов уу.
С.Данзан
