Өвлийн хатуу цаг, зудыг давж, урин цагтай золгосон говьчуудад сонгуулийн зуд гээч зүйл нүүрлэчихэж. Мал сүргээсээ чамгүй тоо толгой хорогдуулсан малчны хотоор МАН, АН-гүй давхилдаж, зудны дараах зуд болгож байгааг малчид ундууцан ярих аж. Тэр тусмаа толгойноосоо эхлээд муудаж эхэлсэн АН-ын горилогчдыг нэлээдгүй ад үзсэн шинжтэй байна. Арга ч үгүй. Нам нам сольж, тойрог тойрог сэлгэсэн, дорноговьчуудын нэрлэж байгаагаар “нэг муу горилогч” О.Баасанхүү очихоор хэн ч дургүйцнэ. Анх Н.Энхбаярын нөлөөллөөр УИХ-д орж ирсэн О.Баасанхүү Орхон аймгаас нэр дэвшиж, 28 хувийн саналаар арай гэж хоёр дахь удаагаа парламентын босго давсан. Эцэст нь Х.Баттулгын захиалгаар Н.Энхбаяраас МАХН-ыг булаах гэж санаархаад бүтэлгүйтсэн учраас АН-д нөмөр бараадаж, харин одоо говьчуудын тархийг угаахаар шийдсэн бололтой. Энэ цагийн будилааны гол эзэн “Б.Хурцын машины хонины хонхорт явдаг” гэх Б.Баасанхүү шиг нам нам дамжиж, тойрог тойрог сэлгэсэн урвагч нөхрийг говьчууд тоохгүй нь ойлгомжтой. Гэхдээ намынхаа нэрийг унагааж явна. С.Зоригийн хэрэгт холбогдуулан, гэм зэмгүй хүмүүсийг яллахад тэр яагаад дуугараагүй юм. Өөрийгөө шударга хуульч гэж цоллодог биз дээ. Яагаад энэ хэлмэгдүүлэлтийг гардан гүйцэтгэсэн “Б.Хурцын машины хонины хонхорт явж” байдаг юм гээд асуудал бий. Хэлмэгдсэн Т.Чимгээ Дорноговь аймагт ажиллаж байсан хүн. Түүний ах Т.Хүрэлбат нь өнөөдөр Дорноговь аймагт ажиллаж амьдарч байгаа төдийгүй шударга ёсны төлөө тэмцэж яваа шударга хүн гээд О.Баасанхүүг нааш гэх хүн Дорноговь аймагт лав байхгүй.

Хэлмэгдүүлэлтийн загалмайлсан эцэг гэж болох Б.Хурцын үг хүслийг парламентын түвшинд хүргэдэг цор ганцхан гишүүн байсан гэхээр хэн ч дургүйцнэ. Тэр яагаад авлигын загалмайлсан эцэг Т.Бадамжунайгаас санхүүждэг юм гээд бодохоор өнөөх л бүлэглэлийнхээ эрх ашгийг гүйцэлдүүлэхээр говьчуудын дэмжлэгээр парламентад зүтгэж явааг эрх биш олон нийт гадарлах байх. Цаашлуулбал, бүлэглэлийн зохион байгуулалтыг зангидаж байгаа Ц.Элбэгдоржийн гар хөл явж байна гэсэн үг. Ингэхэд тэр Дорноговь, говийн аймгуудад ямар гавьяа байгуулсан болоод нэр дэвшихээр горилж яваа юм гэх байх. За үүнийг орхилоо гэхэд тэр УИХ-д хоёр удаа сонгогдон, найман жил ажиллахдаа амьдралын хөрсөн дээр бодитоор хэрэгжиж болохуйц ямар хууль баталсан юм. Нэрлэх зүйл даанч байхгүй. Б.Хурцын дэмжлэгээр говийн бүсээс горилж байгаа О.Баасанхүүгээс болгоомжлох хэрэгтэй гэдгийг надаар хэлүүлэх юун.

Энэ мэт зүйлээс болж, говийн бүсэд АН-ын нэр хүндийг гутааж байгаа нэр дэвшигч бол О.Баасанхүү юм. Өөр бусад хамтрагчид нь ч АН-ын нэрийг унагаахаар нөхөд. Р.Эрдэнэбүрэн гэхэд “Барилгын салбарыг дэмжих, улмаар орон сууцны үнийг тогтворжуулах” дэд хөтөлбөрийг хэрэгжүүлэх ажлын хүрээнд хууль бус шийдвэр гарган, давтан үйлдлээр бусдаас хээл хахууль авсан хэрэгтээ хоригдож байсан гэх мэт олон сөрөг зүйл сөхөгдөх болно. Нөгөө талаас ломбардны сүлжээгээр ядарсан иргэдийнхээ тэтгэвэр, халамжийн дэвтрийг барьцаалан мөлжиж, түүнийхээ мөнгөөр эргүүлэн тэднийхээ саналыг цуглуулахаар явж буй Д.Алтангэрэл гэж нөхөр бий. Эхнэрээ зодож асуудалд орж, эцэст нь цагдаад авлига өгсөн хэрэгт холбогдож байсан алдарт Д.Сүндийгийн ах гэхээр бүр илүү таних байх. Мөн аймгийн ИТХ-ын даргаар ажиллахдаа орон нутгийн ажлыг Засаг дарга П.Ганхуягтайгаа нийлж унагаасан гэх Г.Ганбаатар гэж нөхөр гэж бий. Хувийнхаа бизнеэсээс өөр бүтээж босгосон зүйлгүй энэ нөхөр чухам ямар нүүрээрээ дорноговьчуудаас санал гуйхыг таах аргагүй. Тэгэхээр энд өмгөөлөл үзүүлж шантааж хийж яваад, парламентад ирсэн даруйд бүлэглэлийн гар хөл болсон нэг шантаажлагч, өндөр хүүгээр иргэдээ мөлжсөнөө бизнес гэж андуурсан нэг нөхөр, аймаг орон нутгийнхаа хөгжил дэвшлийг хамтрагчтайгаа нийлж унагаасан нэг нөхөр, УИХ, Засгийн газрын түвшинд ажиллахдаа бусдаас авлига авч байсан нэг нөхөр гээд өөдтэй зүйл алга байна л даа. Дээрээс нь нүүрсний хэрэгт холбогдоод буй Өмнөговь аймгийн Засаг дарга Р.Сэддорж гээд бас л өөдтэй сонсогдохгүй.

АН-аас горилогчдыг орон нутаг дахь АН-ын гишүүд дэмжигчид хүртэл ад шоо үзэж байна гэхээр уг улс төрийн хүчин хүмүүсээ зөв сонгож нэр дэвшүүлсэнгүй. Гэхдээ тэд аль аль нь мандатаа аваагүй байгаа учраас АН-ын удирдлагуудын зүгээс ч анхаарна биз ээ. Яаж бодохоороо 2020 онд ганцхан Дорноговь аймгаас ч санал цуглуулж чадаагүй Д.Алтангэрэлийг говийн бүсэд нэр дэвшүүлдэг байна вэ. Юу төлөвлөхөөрөө очих ч тойроггүй болсон О.Баасанхүүг говийн бүсэд өрсөлдүүлэхээр явуулдаг байна вэ. Ийнхүү О.Баасанхүүг говийн бүсэд ад үзэн ядаж байхад сэтгүүлч С.Мөнхбаясгалан ч бас юув дээ. Хэдийгээр “Женко” ах нь мөнгийг нь хангалттай цутгах хэдий ч говьчууд мөнгөнд бүдрэх хүмүүс биш л дээ.

МАН-аас ч гэсэн уул уурхай цөлмөсөн үндэсний олигархиуд тэргүүтэй баг очно. Ялгаагүй ард түмний өмчийг цөлмөж байгаа шинэ цагийн баячууд очно. Яахав ээ, АН-ыг бодоход бас чиг алагтай цоогтой. Ядахад аймаг орон нутгаа зөв зүгт удирдаж байсан нөхөр, элдэв хууль бус зүйлд хутгалдаагүй эмэгтэй гээд арай л гэгээлэг талдаа баг алаглаж очно. Ерөнхийдөө иргэд говийн бүсэд шинэ сонголт, шинэ хүмүүс л гаргаж ирэх сонирхолтой байгаагаа өгүүлнэ лээ. Ингэхээс ч өөр аргагүй нөхцөл байдал туулж ирсэн. Өнгөрөгч 34 жилийн алдаа завхрал, нийгэм, эдийн засгийн хямрал бол өнгөрөгч жилүүдэд парламент бүрдүүлж, Засгийн газарт багтаж байсан хүмүүсийн л зангидсан бодлого шүү дээ. Найман удаа сонгож гэнэдсэн түмэн ес дэх удаагаа гэнэднэ гэж үгүй л дээ.

Т.ГАНХУЯГ