Ерөнхий сайд Л.Оюун-Эрдэнэ "Улаанбаатараас ярьж байна" нэвтрүүлгийн ярилцлага одоо ч олны анхааралд байна. Мөнхүү энэ ярилцлагын шилийг даран гарсан С.Зориг агсны гэргий Б.Булганы ярилцлага ч олны анхааралд байна. Уг нэвтрүүлгийг 14 телевизээр нийт 15 удаа дамжуулж, олны хүртээл болгосон нь ч санаандгүй хэрэг биш. Энэ үеэр Ерөнхий сайд С.Зориг агсны хэргийн захиалагчийг шууд бус нэрлэсэн ч гэж болохоор харагдаж, бас уншигддаг.
Тэрбээр “С.Зоригийн хэргийг хаахын тулд яагаад ийм зохиомол хэрэг үүсгэсэн бэ гэдгийг Б.Хурц болон зарим прокурор үнэнээр нь хэлэх өдөр ирэх байх гэж итгэдэг. Би тэднийг буруутгадаггүй. Учир нь тэд "Мэдлээ, гүйцэтгэе" гэдэг хүмүүс. Х.Баттулга Ерөнхийлөгч ч бас үнэнээ хэлэх байх. Ц.Элбэгдорж Х.Баттулгад Ерөнхийлөгчийн тамга хүлээлгэж өгөхдөө “Надтай уулзаад ганцхан С.Зоригийн хэргийг л битгий сөхөөрэй, бусад нь надад хамаагүй гэж хэлсэн” гэдгийг ч ярьсан.
Харин Төр, нийгмийн нэрт зүтгэлтэн С.Зориг агсны гэргий Б.Булган 1998 онд нэг удаа, Нөгөөдөр сонинд товчхон ярилцлага өгч байснаас хойш ярилцлага өгөөгүй бажй байгаад саяхан ярилцлага өглөө. Сэтгүүл зүйн үүднээс аваад үзэхэд өөдтэй ярилцлага болоогүй ч энэ эрхэм талийгаач нөхрийнхөө аллагын захиалагчдыг нэрлэсэн нь олны анхаарлыг татсан хэрэг. Тэрбээр Т.Чимгээ, Б.Содномдаржаа нар бол С.Зоригийг хөнөөсөн алуурчид биш. Ц.Элбэгдорж захиалагч, Б.Хурц гүйцэтгэгч” гэдгийг зарлачихсан юм.
Одоо нэгэнт Ерөнхий сайд Л.Оюун-Эрдэнэ шууд бусаар С.Зоригийн хэргийн талаар хэлчихлээ. Эхнэр Б.Булган нь шууд зарлачихлаа. Тэгэхээр энэ хэргийн захиалагч нь тодорхой болчихлоо, гүйцэтгэгч нь тодорхой болчихлоо. Нэг тийш нь болговол яасан юм бэ. Нөгөө талаар уг хэргийг бүхэлд нь нууцсаас гаргах асуудал ч хурцаар тавигдах болжээ. Тодотговол, С.Зориг агсан бусдын гарт амь насаа алдсаны маргааш буюу 1998 оны аравдугаар сарын 3-ны Засгийн газрын ээлжит бус хуралдааны тэмдэглэл олон нийтэд хараахан ил болоогүй байгаа. Энэ талаар албан эх сурвалжаас тодруулахад "Тус тэмдэглэл албажиж гарах хугацаандаа явж байгаа" гэсэн нь бий. Өмнө нь 2021 оны гуравдугаар сарын 31-нд болсон Засгийн газрын хуралдаанаар С.Зориг агсны амь насыг хөнөөсөн хэргийн материал холбогдох бичлэгүүдийг бүхэлд нь улсын нууцаас гаргаж байв. Энэ мэтээр үүсэж буй болж байгаа нөхцөл байдлаас харахад С.Зориг агсны хэргийг нэг тийш шийдвэрлэх боломж бүрдэж байгаа юм болов уу.
SONGOLT.MN
