Парламентын түүхэнд олон солгой, согтуу гишүүн байсан. Эртнээсээ, ерээд оны дунд үед парламентад сууж байсан "Сум" Х.Дашзэвэгээс эхлээд "Фортуна" Н.Батбаяр, "Буян" Б.Жаргалсайхан, "Аттила" Л.Гүндалай, "Нарантуул" Ш.Сайхансамбуу гээд балайдуу гишүүд байсаан, байсан. Нуухгүй. Өдгөө ч арай боловсронгуй болчихсон балайнууд цөөнгүй бий. Харин УИХ-ын гишүүн Д.Ганбат шиг эрүүл хэрнээ “дэн дун” гишүүн байсангүй. УИХ-ын чуулганы хуралдаанаас эхлээд бүхий л хуралдаанд байр сууриа илэрхийлэх хачин дуртай ч зөв зүйл ярина гэж үгүй, байнга хадуурна.
Энэ талаараа тэр од болсон хүн. Түүнд “дэн дун” гэх үг л зохицох хийгээд уг үгийг “Монгол хэлний их тайлбар толь”-иос харахаар “арай ядан, арай чүү, дэн дун, дээсэн дөрөөн дээр, дөнгөн данган, хаашаа ч болж мэдэх” гэсэн давхар, давхар утгыг илэрхийлдэг байна. Тайлбар толины агуулгыг дагаж, Д.Ганбат гишүүний үгийг түүвэрлэн харахаар яах аргагүй “дэн дун” гэсэн үгийн ай савд өөрийн эрхгүй багтах аж. Тэрбээр өнгөрөгч 2020 оны сонгуулиар өрсөлдөгчийнхөө эсрэг ном хэвлэн тарааж, бидон сав тараан байж “арай ядан” УИХ-д орж ирээд “арай чүү” гэж парламентад багтаж байгаа гишүүн. Өөрөөр хэлбэл, УИХ-ын гишүүний бүрэн эрхийн асуудал байхгүй байсан бол аль эрт ажлаасаа хөөгдөх нөхөр. Ядахад АН-ын гишүүд гэж нэгнээсээ ялгарах зүйлгүй нөхөд бүлгийнхээ даргаар хоймроо залчихсан нь улам бүр “дэн дун” болгож байсныг та бүхэн санаж байгаа байх.
Ёстой л “Мах барагдахаар богтос ахална” гэдэг болсон л доо. Тэр УИХ-ын чуулганы болон бусад хуралдаан дээр тэс хөндлөн орж ирээд зогсохгүй, ямар ч утга учиргүй, ойлгомжгүй яриа өрнүүлж, гишүүдийн бүү хэл ард түмний цухлыг барна. Ямар сайндаа боловсролын салбар үүсэж хөгжсөний 100 жилийн ойн арга хэмжээний үеэр УИХ-ын гишүүд тус тусын мэнд хүргэж байхад Д.Ганбат гишүүн “Өнөөдөр боловсролын салбар үүссэн 100 жилийн ойн өдөр. Баяр хүргэе. Мөн дэлхийн синглчүүдийн өдрийн мэнд хүргэх ёстой. Монголын ганц биечүүддээ энэ өдрийн мэндийг хүргэе" хэмээж байгаагаас харвал хаа ч “Дээсэн дөрөөн дээр” байгаагаа шуудхан хэлж байна. Гэтэл манай улсад ганц бие хүмүүсийн өдрийг тэмдэглэдэггүй.
Цар тахлын үеэр Д.Ганбат гишүүн “Цар тахал Монгол Улсын бүх аймагт тархлаа. АН-ын засаглаж байгаа гурван аймагт л халдвар тархаагүй байна” хэмээн хадуурна. Улстөржихөд хүртэл учир бий. Яахав, “Сайнтай муутай сав дүүрдэг” дээ. Нэгэнт л баянхонгорчууд сонгосон учраас бүрэн эрхийнх нь хугацааг дуусгавар болгож байна. Одоо ахиад сонгохоор бүр л “Дэн дун” болох байх даа. Гэхдээ энэ удаагийн сонгууль бүсчилсэн хэлбэрээр Архангай, Баянхонгор, Өвөрхангай гээд гурван аймгаас санал авах учраас гурвын гурван аймгийнхан “Дэн дун” гишүүнтэй байхыг хүлээн зөвшөөрөхгүй байлгүй. Ганц нэг удаа нутгийнхан нь хөөрхий нутгийн юм гээд сонгосон байж болно. Төрийн эрх барих дээд байгууллагад ийм төлөөлөл илгээчихээд гурван аймгийн иргэд юу бодож суух юм.
С.Ууганбаяр
