Улаанбаатарын утааг бууруулах зорилгоор Засгийн газраас олон арга хөтөлбөр хэрэгжүүлж, нийтдээ нэг их наяд төгрөг зарцуулсан ч нийслэл маань агаарын бохирдлоор дэлхийг тэргүүлсэн хэвээр байна. Нөгөө талаар өнгөрсөн хугацаанд хэрэгжүүлсэн төсөл хөтөлбөрүүдээс хамгийн уршигтай, урхагтай нь утаагүй түлш байлаа. У.Хүрэлсүхийн Засгийн газар Улаанбаатарт түүхий нүүрс түлэх шийдвэрийг гаргаж, сайжруулсан түлш төслийг хэрэгжүүлж эхэлснээс хойш цөөнгүй хүн угаартаж амиа алдсан. Гэвч амиа алдсан иргэдийг архидсан байдалтай, яндан хөөлгүй, хаалт хаасан гэх мэтээр нь дуудаад хэргийг хаасаар иржээ. Энэхүү статистикаас харвал өнгөрөгч найман жилийн хугацаанд 616 хүн угаартаж амиа алдсан байна. Хэлтгийдүүхэн хэлбэл, нэг их наяд төгрөгөөр 616 хүн угаартуулсан байна гэсэн үг.
