УИХ-ын ерөнхий нарийн бичгийн дарга Б.Баасандорж мэдээлэл хийлээ.
Тэрбээр “Ээлжит бус чуулган 2024 оны наймдугаар сарын 15-нд эхэлж наймдугаар сарын 30-ний өдөр хүртэл хуралдсан. Асуудлаа бүрэн хэлэлцэж дуусахын тулд дунд нь нэг удаа гурав хоногоор сунгасан. Нийт 30 хууль, тогтоомж баталсан.
Зарим яам, агентлагт хууль давсан дүрэм баталсан тохиолдлууд их байна. Энэ дүрмээрээ иргэн, аж ахуйн нэгжид үйлчилгээ үзүүлж хохироож байна гэдэг асуудлыг хөндсөн. Ингээд УИХ-ын гишүүдээс санал авч 53 ажлын хэсгийг УИХ-ын даргын захирамжаар байгуулсан.
Хүний эрх хууль зүйн хүрээнд 16 ажлын хэсэг, төрийн байгуулалтын болон төрийн албаны чиглэлээр таван ажлын хэсэг, нийгмийн хамгаалал, боловсрол, эрүүл мэндийн чиглэлээр ес, эдийн засаг, аж ахуйн үйл ажиллагааны чиглэлээр 16 ажлын хэсэг, байгаль орчин, хүрээлэн буй орчны чиглэлээр гурван ажлын хэсэг, хот байгуулалт, дэд бүтцийн салбарын хүрээнд таван ажлын хэсэг байгуулсан. Эдгээр ажлын хэсгээс 18 нь энэ намрын чуулганд асуудлаа өргөн барьж хэлэлцүүлнэ. Үүнээс нэн тэргүүнд асуудлаа хэлэлцүүлэх ажлын хэсгүүд бий. Тухайлбал, УИХ-ын 2024-2028 оны стратеги төлөвлөгөөг боловсруулах ажлын хэсгийг УИХ-ын дэд дарга Х.Булгантуяагаар ахлуулан байгуулсан. Энэ ажлын хэсэг энэ намрын чуулганы хугацаанд стратеги төлөвлөгөөгөө өргөн барьж батлуулах ёстой.
Хоёрдугаарт, Төрийн албаны тухай хуулийн хэрэгжилтийг судлах, санал дүгнэлт гаргаж хуулийн төсөл боловсруулах үүрэг бүхий ажлын хэсгийг Г.Дамдинням гишүүнээр ахлуулан байгуулсан.
Гуравдугаарт, Хууль, тогтоомжийн тухай хуульд өөрчлөлт оруулах ажлын хэсэг байгуулсан. Хуулийн төсөл боловсруулахад иргэний нийгмийн байгууллагуудын оролцоо хязгаарлагдмал байна гэж үзэж байгаа учраас хуульд өөрчлөлт оруулахаар болсон. Энэ ажлын хэсгийг УИХ-ын Хууль зүйн байнгын хорооны дарга Д.Цогтбаатар ахалж байгаа.
