Өмгөөлөгч Г.Батбаярын учир битүүлэг үхэл нийгэмд хардлага дагуулж байна. “Амиа хорлосон байдалтай” олдсон гэдэг мэдээлэл тараасан нь ч тэр, талийгаачийн машиныг онгойлгохдоо гэр бүлээс нь хүн байлцуулаагүй зэрэг нь ямар нэг ул мөр нууж байгаа мэт хардлага дагуулж байна. Бие эрүүл, ухаан саруул, ид насны эр хүнд ямар нэг ужиг өвчин байгаагүй гэлцэх.

Тэрбээр соёлын дурсгалт Ноён уулыг авч үлдэхийн төлөө тэмцэж, улсын хамгаалалтад авахуулж чадсан зүтгэлтнүүдийн нэг. Түүнчлэн Тост, тосон бумбын нурууг улсын хамгаалалтад авахад ч тэргүүн магнайд явсан.

Мөн Ноён уул, Дубайн гэрээ, Эрдэнэтийн 49 хувь гээд түүний өмгөөлөөгүй томоохон асуудал гэж үгүй. Хамгийн сүүлд ураны асуудал дээр хатуу байр суурьтай зогсож байсныг монголчууд бүгд мэднэ. Энэ бүгдээс харахад, тэрбээр гадны оролцоотой, улс төр, бизнес бүлэглэлийн гар хөлөө шургуулсан асуудлууд дээр ажил мэргэжлийн үүргийн дагуу оролцож ирсэн нь амиа алдах шалтгаан болсон байхыг үгүйсгэх аргагүй юм. Хамгийн сүүлийн мэдээллээр талийгаач нь бүлэглэлийн ашиг сонирхолтой Хархайн толгойн төсөл дээр өмгөөлөгчөөр ажиллаж байсан аж.

Ямартай ч “Миний явуулж байгаа нийгэмд тустай мэргэжлийн үйл ажиллагаанд хорсож атаархсан үйл явдал болдог. Тийм учраас би зүгээр зогсож байгаад цаазын тавцан дээр хүзүүгээ тавьж өгөхгүй. Үзнэ дээ” хэмээн байр сууриа илэрхийлж байсан удаатай.

Эцэст нь хэлэхэд, нийгмийнхээ сайн сайхны төлөө эр зориг гарган, улс орон, ард түмнийхээ эрх ашгийг хамгаалж чадсан, сэтгэлийн хаттай, эх оронч эр хүн амиа хорлоно гэж лав байхгүй. Учир нь түүнд том зорилго байсан.

Tsendsuren Gantulga