Улс төрийн намууд нэр дэвшигчдээ тодруулж, эцэс төгсгөлгүй мандатын төлөөх тулаан өндөрлөж байна. Мандатгүй үлдэгсэд гомдлоо тайлж, мандатын эзэд дараа дараагийнхаа ажилд ханцуй шамлав бололтой. Тойргуудыг харж байхад АН ерөнхийдөө ихэд суларч, өнөөх л бүлэглэлийн гар хөлөө энд тэндгүй шургуулжээ. Харин МАН шийр зааж, “Эхийг нь эцээхгүй, тугалыг нь тураахгүй” харагдуулахаар хичээсэн ч өнөөх л хөрөнгөтнүүд нь тойргуудыг мөнгөөр зодох үүрэг хүлээсэн бололтой. Хамгийн сонирхолтой тойрог бол Говь-Алтай, Увс, Ховд, Завхан аймгуудын тойрог байна. Өрсөлдөгчид нь бараг тэр чигээрээ хөрөнгөтнүүд.
АН-аас гэхэд УИХ-ын гишүүн О.Цогтгэрэл байна. Тэр хэдийгээр төрөөс төрсөн тэрбумтан биш ч хөрөнгөтэй хүний тоонд орно. Ямартай ч дөрвөн аймагт явгарахгүй нөхөр. Мөн УИХ-ын гишүүн Б.Пүрэвдорж ч бас бусдад зайгаа тавьж өгөхгүй. Үүнээс гадна Говь-Алтай аймгийн Засаг дарга О.Амгаланбаатар ч аймгийн төсвөөр бүтсэн шинэ цагийн хөрөнгөтөн юунаас айхав. Харин Физикийн ухааны доктор Н.Тэгшбаяр чухам хөрөнгөтнүүдтэй хэрхэн яаж тулах гэж байгааг мэдэх юм алга. Цаадуул нь мөнгөөр нүдчихмээр л харагдах юм. Үүнээс гадна санхүүгийн зах зээлд чамгүй хөрөнгөтэй УИХ-ын гишүүн асан З.Нарантуяа, гаалийг цөлмөж, бусдад авлига хүртэл өгч явсан УИХ-ын гишүүн Ш.Адьшаа, УИХ-ын гишүүн асан Д.Батцогт, НИТХ-ын төлөөлөгч Ц.Одонтунгалаг, Завхан аймгийг засаглаж, хөрөнгөө зузаалсан Засаг дарга асан Д.Батсайхан, Б.Түвшин гэх мэт хөрөнгө мөнгөөр тийм ч дутахааргүй 10 мандатын эзэн тодорчээ.
АН-ын мандатын эзэд болон жагсаалтыг харсан хүмүүс шүүмжилж байгаа ч баруун бүсэд тун гайгүй дүрүүд тодорч гэж болохоор. Эндээс УИХ-ын гишүүн О.Цогтгэрэл, Б.Пүрэвдорж нарыг гайгүй үнэлж байгаа бол УИХ-д анх удаа хүч үзэж буй физикийн ухааны доктор Н.Тэгшбаярыг орж ирсэнд олон нийт олзуурхаж байна. Урьд өмнө физикийн салбарын Н.Алтанхуяг АН-ыг төдийгүй Монгол Улс, Засгийн газрыг чамгүй шударга удирдаж байсан нь ч нөлөөлсөн байх. Нэр дэвшигч Н.Тэгшбаярт нийгэм ам сайтай байна. Яаж ч бодсон шинжлэх ухааны хүмүүс энэ төрд олноор хэрэгтэй л дээ. Харин Ш.Адьшаа, Д.Батсайхан, О.Амгаланбаатар, Д.Батцогт нарт төдийлөн таатай хандахгүй байгааг нийгмийн салхи хэлж байна.
Гэхдээ баярлах болоогүй. МАН талаас үндэсний томоохон хөрөнгөтнүүд, төрөөс төрсөн тэрбумтнууд хүч үзнэ. Юуны өмнө хөрөнгөөр ч хороор ч илүүрхэж байгаа Ч.Хүрэлбаатартай тулна. Ингээд төрөөс төрсөн тэрбумтан, бүхий л тендерийг хамж байдаг Б.Чойжилсүрэн, С.Бямбацогт нар удаална. Эд нар бол мөнгөөр бороо оруулсан ч дөрвөн аймгийг гандаахгүй болтлоо УИХ-д сууж, идэж ууж завшсан нөхөд. Дараагийн хөрөнгөтнүүд болох УИХ-ын гишүүн асан Н.Цэрэнбат, Ц.Цэрэнпунцаг гээд явна. Мэдээж хэрэг, сайд асан С.Энхболд, З.Мэндсайхан, УИХ-ын гишүүн Б.Баярсайхан, аймгийн Засаг дарга Э.Болормаа нар ч хувиа хүнд өгөхгүй гэж үзэх байх. Үүнээс харахад баруун бүсэд МАН-аас ч АН-аас ч томоохон хөрөнгөтнүүд хүч үзэх юм байна.
С.ДАНЗАН
