“Take Off” хамтлаг 20 жилийн ойн тоглолтоо зохион байгуулах гэж байна. 2004 оноос уранн бүтээлээ туурвиж эхэлсэн “Take Off” хамтлаг хамгийн анх “Чи яагаад би”, “Хэн нэгийг”, “Зүүдний минь шөнө” зэрэг дуугаа сонсогчдодо анхлан хүргэж, анхны цомгоо “Гурван цаг” нэртэйгээр 2005 онд гаргаж байв. Үргэлжлүүлэн 2006 онд “Мартахгүй”, 2008 онд “Хайрын нислэг” цомгоо гарган, эл цомгуудад багтсан “Цасан дээр”, “Мартахгүй”, “Гүнж”, “Чиний явсан зүгт”, “Буцаад л хоёулаа” зэрэг дуунууд нь хит болж байлаа.

"Take Off" хамтлагийн дуучин Д.Баясгалан:

-Энэ жил 20 жилийн ойн тоглолтууд маш их зохион байгуулагдлаа. Тэр цаг үед олон хамтлаг уран бүтээлчид гарч ирсэн байна. Энэ утгаараа түүхэн 20 жилийн ойгоо тэмдэглэн өнгөрүүлж байна.

Манай "Take Off" 20 жилийн баярын тоглолтын онцлог гэвэл түүхэндээ анх удаа монголын бой бэндүүдийн үе үеийн төлөөллүүд сюрприз барин оролцож байгаа гэдгээрээ онцлогтой. Мөн зочин дуучид урилгаар уран бүтээлээ хүргэнэ.

Бусад хамтлагийн гишүүд оролцож "Take Off" хамтлагийн олонд хүрсэн "Уучлаач хайрт минь", "Гүнж" дуунуудыг шинэ хувилбараар дуулсан байгаа гэв.

Тэгвэл тус хамтлагийнхан 20 жилийн турш гаргасан шилдэг дуунууд болон шинэ бүтээлүүдээ энэ арваннэгдүгээр сарын 23-нд “Crocus event hall”-д толилуулах гэж байна. Тоглолтод тус хамтлагтай хамтран ажиллаж байсан уран бүтээлчид, үе үеийн Монголын boyband-үүдийн төлөөлөл оролцох аж.